في الكورة : أفشة انداس عليه.. بيبو يكشف كواليس عقوبات نجوم الأهلي وحملات التقطيع ضده

كشف خالد بيبو مدير الكرة السابق في النادي الأهلي عن كواليس عقوبات نجوم القلعة الحمراء إبان توليه المهمة قبل رحيله عن منصبه. 

قال خالد بيبو مدير الكره السابق بالنادي الأهلي عبر تصريحات تليفزيونية: 

الناس عايزه كل واحد بيشتغل في مكان يبقى شغال على هواها هيا. 

تابع: أنا خلال تواجدي في منصب مدير الكرة في الأهلي كانت الناس بتتكلم عليا كل شوية إني ليه مش بقوم اعترض على التحكيم زي كابتن سيد عبدالحفيظ. 

أضاف: أنا مشيت ومحدش بقى بيتكلم في النقطة دي خالص ولا بيذكرها اصلا. 

استطرد: الكابتن رمضان نفس الشئ لان من طبيعته قاعد على الدكة مش بيعترض والفكره اصلا اعترض ليه على التحكيم ما هو في فار .. والسنة اللي أنا كنت فيها خدنا كل البطولات. 

وقال خالد بيبو مدير الكره السابق في النادي الأهلي أيضا:  

اتعمل عليا حملات وكان في ناس دايما تطلع تقول ليه مبعترضشي على الحكام وتحملني اي خساره للفريق ولما مشيت محدش بقى بيتكلم. 

واصل: كابتن رمضان موجود ومتخنقشي مع الحكام ومتقالتش .. هو مش بيقوم من على الخط زي كابتن طارق سليم وكابتن صادق وثابت البطل مكنوش بيقوموا من على الخط ومحدش كان بيتكلم.

وأكمل: كان في اشخاص ورا توجيه الجمهور ضدي لما كنت موجود في منصب مدير الكرة، ومش هقدر اقول اسامي الاشخاص دي. 

وأتم: مش مسامح اي حد ورا توجيه الجمهور ضدي وان شاء الله ربنا يوريني فيهم يوم، لان الناس دي وحشه.

وأردف: الاشخاص دي عارفهم كويس، وهيضروا النادي طوال تواجدهم وهما عارفين نفسهم كويس. 

وأسهب خالد بيبو مدير الكره السابق في النادي الأهلي:  

مكنشي ينفع اطلع اقول كل قرار باخده ضد أي لاعب .. كان صوتي بيطلع جامد في غرف خلع الملابس وحصل الموضوع ده خمس مرات مثلا والكلام ده مكنشي بيطلع لحد

وردا علي سؤال هل كان في عقوبات تقيله ضد كهربا وافشه؟ قال: اه كهربا وافشه وكان في ناس تانيه كمان وناس من كباتن الفريق اتعاقبت واي حد غلط في تواجدي اتعاقب بس الحاجات دي مطلعتش

وعن عقوبات أفشة قال: أنا صعب عليا افشه لما طلع قرار عقابه وحسيت أن الواد انداس عليه من مصر كلها وكأنه غلط فيهم كلهم .. وقرار عقابه قولتله لانك غلطت قدام الناس كلها فكان لازم تتعاقب قدام الناس .. في الاخر اللعيبه كلها بتغلط وده الطبيعي في كرة القدم.

واختتم حديثه قائلا: أنا كنت بحاول احافظ على لعيبتي لان دلوقتي بقى في قنوات كتيره اوي وبرامج كتيره اوي وكل واحد عنده اكونت في السوشيال ميديا بقى بيتكلم .. فلازم حاجات تبقى في الغرف المغلقة.